政情：拒做美國二等公民 梁智鴻無悔冇移民
近月連串反修例示威衝突，令市民對香港前景感到憂慮，有調查顯示唔少人都想移民，而有「金刀梁」之稱嘅泌尿科專科醫生梁智鴻，早前接受訪問時就自爆曾經有機會移民美國，但最終放棄咗離開香港嘅機會，究竟點解呢？
多所學府招手 不為所動
金刀梁喺一九七○年代初赴美國加州大學洛杉磯分校（UCLA）進修，之後就有幾間包括芝加哥及佛羅里達州嘅大學向佢招手，提供教席叫佢留低發展，佢就有機會拎美國公民資格。不過，思前想後，呢個英語能力叻過中文嘅「香港仔」最終都係婉拒咗，原因係佢仍然有服務香港嘅心，亦都唔想喺彼邦做二等公民，直到依家都話當時嘅決定係啱嘅。
金刀梁既是醫生又係公職王，曾經出任香港大學校務委員會主席、行政會議成員及醫院管理局主席等，人生歷練豐富，佢話無論喺咩環境下，理性都好重要，人同人之間如果無互諒互讓，唔肯求大同存小異，都係行唔通嘅，睇嚟佢對近日香港嘅亂局好有感觸喎。