政情：辭任國泰CEO 何杲連公職都冇撈
因管理不善而在全球最佳航空公司排名跌出三甲嘅國泰航空，近期頻頻對參與同支持反修訂《逃犯條例》示威嘅員工派大信封，高層人事亦都多番變動，八月中就有行政總裁何杲請辭，而何杲冇咗國泰份工之後，最新就係連公職都冇撈喇。
政府尋日公布，何杲辭去航空發展與機場三跑道系統諮詢委員會職務，因應何杲嘅辭任而委任鄧健榮接替，鄧嘅任期就由即日起到二○二一年七月三十一日。
回歸以來任期最短
國泰行政總裁任期為三年，但何杲當時只做咗兩年零三個月就辭職，係少數未能完成任期嘅管理層，更係回歸以來任期最短嘅國泰行政總裁，當時何杲未有阻止旗下員工參與反修例示威活動，事後向員工發信補鑊，但最終都要主動請辭，而佢今次嘅公職都係同一命運，由佢自己辭去喇。