中環出更：冷門旅遊點魅力 劉燊濤赴沙特尋幽探勝
香港人鍾意旅遊，唔少人對歐美日韓等熱門國家已經去慣去熟，以致開始到訪較冷門嘅旅遊地點。沙特阿拉伯呢個盛產石油嘅中東國家近來放寬限制，容許外國人申請旅遊簽證入境觀光。香港表廠商會副主席劉燊濤就因生意關係，已多次到訪沙特阿拉伯，佢仲話總算領略到當地嘅旅遊魅力添。
劉燊濤話，沙特阿拉伯民風保守，保安嚴密，氣氛凝重，不過當地濃厚嘅宗教色彩同別具特色嘅飲食文化都好值得喜歡尋幽探勝嘅旅遊人士。不過佢就坦言，該國過去唔太注重觀光事業，遊客要攞簽證並唔容易，佢都係靠當地人發出嘅介紹信先得以向沙特阿拉伯駐港領事館申請商務簽證入境。佢又話，如果要去當地，最好避免仲夏至初秋呢段時間，皆因高達攝氏四十度嘅氣溫實在令人難受，況且好大機會遇上「齋戒月」，日間隨時冇啖好食。此外當地食品未必啱港人胃口，所以唔算係理想嘅家庭度假勝地。
孫蔡吐媚恨去不丹
講起冷門旅遊地點，仁濟醫院副主席孫蔡吐媚就話，若果有機會，就算要好似當地婦女咁穿上罩袍，都唔介意一遊沙特阿拉伯。不過相較之下，佢就喜歡到佛教國家旅遊喇。佢解釋話，畢竟中國人或多或少都受過儒釋道文化熏陶，去到佛教國家都會有一種親切感喎。而佢最渴望到訪嘅佛教國家就係快樂指數居世界前列嘅不丹喇。
賽馬會行政經理陳岳鵬早前得到就讀美國哈佛大學時嘅蒙古同學接待，經歷咗一個地道嘅蒙古生活之旅。佢仲話，當佢見到蒙古一望無際嘅大草原時，就心諗如果香港多一兩塊咁遼闊嘅土地，以香港嘅建屋密度，應該可以畀百幾萬人安居樂業，相信好多頭痛問題都得以迎刃而解喎。
卓妮