木桶飯驚現牙齒 餐廳稱豬骨

【本報訊】食飯要慢慢享用,除了有助消化外,亦可避免狼吞虎嚥下,誤吞異物。近日有食客在餐廳點了一客木桶飯,竟發現內藏一粒牙齒狀的物體(圓圖),更帶着疑似牙垢的污物,十分嚇人。網民看後亦稱:「好惡心」。

貼文由網民Cherie Lo在Facebook群組「中伏飲食報料區」發布。事發在上周三(2日)下午一時左右,當時事主正在店內用餐,突然感到口中有異物,「食剩一半咬到啲骨碎,再食食吓竟然有隻牙」,又強調「係一隻有牙垢嘅牙」。從圖片上看,不明物體看上去確實頗像牙齒,非常惡心。事主認為像是豬牙,與侍應理論,對方卻堅稱「唔係牙」,又表示要「拎入去畀廚房睇清楚」。事主堅決拒絕:「會畀食環睇,還你清白」。貼文稱對方最終承認不是,更以「唔記得提醒我,介意有骨碎就唔應該嗌肉碎飯」作解釋。

網民稱惡心 店方已道歉

貼文上載後眾人議論紛紛,有人看過相後表示難以接受,「好惡心,恐怖」;有人從圖片上看,表示懷疑:「你確定真係豬牙?」「似係人牙!」

記者致電餐廳查詢,餐廳負責人表示,由於木桶飯有拆骨肉,可能在豬頭骨拆肉時跌入。但當時客人「一路揸住粒骨,唔畀同事睇」,所以未確定,餐廳最後向事主道歉,亦沒有收錢,希望可以息事寧人。

第一手消息請下載on.cc東網iPhone/iPad/Android/Windows Phone Apps