政情：楊靜全家總動員 送細女英國讀書
好多人都會送仔女去外國讀大學，換個環境，又可以學識自立。香港中華出入囗商會副秘書長楊靜（Sally）都唔例外，大女早喺讀中學已經過咗英國留學，今年細女中六畢業，Sally一家再陪細女去英國開學，同囡囡「新屋」入伙。
Sally喺社交平台發布咗幾張一家四口陪細女去英國開學嘅相，仲有幾張囡囡BB相添！佢話細女從細就係一個開心果，係全家嘅寶貝，既然咁寶貝梗係要全家總動員幫佢搬「新屋」喇！佢話細女好好彩抽中咗有獨立廁所嘅單人房，唔使同其他人共用廁所，而佢哋又一齊去幫細女買床褥、被單同埋廚房用品，因為囡囡要留喺英國四年，所以要買定多啲，佢仲話啲杯杯碟碟裝到成架車滿晒呀！
盼囡囡同宿友相處學識包容
呢次係細女第一次離開屋企搬出去住，Sally話最難適應都係天氣，囡囡前排就打畀佢話冷親，未慣嗰邊天氣。兩個囡囡都去晒英國讀書，Sally有冇唔捨得呢？佢就話最重要係囡囡讀得開心，又話希望囡囡學識包容，雖然住嘅係獨立房，但都要同另外五位同學共用廚房。佢教囡囡唔好介意人哋唔即刻洗碗碟，唔好怕蝕底，要大方啲，做人冇咁計較先開心喎。