政情：建制派議辦燒到爛 職員遷走 有排善後
香港近期出現咗無數場示威衝突，政府部門紛紛成為示威者嘅目標，連建制派議員都不能幸免，好似立法會議員梁美芬，以及何啟明同黃國健（KK）嘅聯合辦事處都分別被破壞，睇相都知道有排先可以回復原狀。
梁美芬何啟明黃國健同遭殃
梁美芬位於石硤尾邨嘅辦事處前日兩度被縱火破壞，仲要係兩個月內再次被破壞。不過佢就嘆辦事處問題只係冰山一角，因為示威者所破壞嘅仲有長久以來嘅和平安寧、法治同埋言論自由。而佢議辦可謂破壞嚴重，唔止門口位置受損，連內部嘅牆身都熏到黑晒喇！
至於何啟明同KK嘅辦事處就相對無咁嚴重，牆壁唔算太黑，而且燒完之後仲望得出係KK嘅工作報告，未完全化為灰燼。何啟明就話要同KK傾吓點善後，但好灰咁話唔知下次幾時再被燒，而職員可以換個地點去住其他辦事處做嘢先。