政情：陳沛然為踢波 出動「舊橋」冧老婆
立法會醫學界議員陳沛然本身就係腸胃科專科醫生，呢排喺反修例嘅連場激烈衝突，仲充當戰地醫生四出為傷者做緊急治療，竟然仲要學急救？講真，係冧老婆呀！仲畀網友寸佢用嘅舊橋，依家啲後生仔唔識o架！
陪上急救課 話「想見多幾面」
話說佢尋日喺Facebook貼文，話朝早陪太太一齊去上急救課，導師問佢點解嚟上堂，佢就回應話係學海無涯，而太太都問點解要陪佢上堂，佢就話：「我唔係想食麵，係想見多你幾面。」佢太太即刻咪咪笑。而就因為咁，太太就放佢去踢波嘞！
相信大家對呢冧招都似曾相識，事關係一輯經典廣告嚟，有心水清嘅網友留言話：「陳沛然醫生議員，啲後生唔識呢個廣告！」真係寸到應一應；另有網友就話：「永遠最老土嘅橋係最work」。但亦有網友大讚佢係「好識氹老婆的足球員」，另一網友就話：「阿陳醫生，你啲硬幽默係得你太太頂得順o架咋！」
其實，佢亦喺網上做心靈輔導，而喺九月份三十日內就寫咗七十五篇文章，播咗四十四首歌，當中亦寫咗三十九篇介紹各地美食嘅食評，仲整咗地圖教大家搵食添！做咁多嘢，當然唔少得佢嘅正職——足球員，佢話九月份踢咗八場波。嘩！平均一星期踢兩場波，加上返醫院同去做戰地醫生，仲有幾多時間陪老婆同三個女？唔怪之得要出招冧老婆，否則唔放佢去踢波。