政情：經濟牌反擊盼戾氣平息 吳永嘉轟攬炒大家一齊輸

近月網上都有鼓吹攬炒風氣，吳永嘉就話攬炒本身係玩啤牌鋤大弟嘅術語，再引伸到近年有電影嘅經典對白「If we burn，you burn with us」，直言有好強嘅鼓動性容易令到年輕人走火入魔。佢又講到幾年前都出現過呢種攬炒心態，就係香港足球代表隊門將明言要阻對手出線，仲話呢個係損人不利己嘅陰暗報復心理，係要不得咁話喎，但競賽中阻止對手又有乜嘢問題呢，唔通佢覺得比賽中明知輸硬就應該放水先啱？

癱瘓機場空運 一日損失逾百億

吳永嘉認為攬炒一詞戾氣十足，向青年人灌輸呢種同歸於盡嘅理念等同鼓勵暴力人生，而過去三個月示威不斷升級，由和平示威去到四出破壞社會秩序，挑戰警方底線，又會阻止港鐵開車同妨礙旅客登機，想盡辦法癱瘓香港，直指攬炒令到政治訴求變成經濟衝擊，任由仇恨滋生同蔓延會積重難返，社會仲會進一步跌落撕裂深淵喎。

佢又以示威者喺機場嘅行動為例，話清晰見到行動升級，由「和你飛」變「萬人接機」，最後仲變成「癱瘓機場」，直言香港機場運作佔香港生產總值百分之五，停運一日料空運貨值就損失超過一百億元，機場管理局盈利亦減少二千幾萬元，再加上官員講過香港每日有廿萬旅客出入，機場停運影響到八十萬貿易同物流從業者生計，推算示威者嘅攬炒直接將過百萬人拖落水咁話。

盼當家作主歸屬感 對抗消極心態

機場以外，佢指旅遊業、酒店業、飲食業等受打擊最大，已經有商界朋友話已經少咗三成生意咁多。佢認為呢類生意邊際利潤本來好薄，好難承受大幅度生意回落，而攬炒對基層開始帶來負面影響，短期內唔改善，料失業率會急劇上升，明年加薪幅度都難令人滿意，但深信港人有當家作主嘅歸屬感，就唔會有消極同報復嘅攬炒心態。

其實示威者從經濟入手就預咗要打擊經濟，吳永嘉再用經濟牌作反擊，似乎係肯定咗示威者嘅手段多過要勸阻佢哋囉！