中環出更：立會修整大致完成 復會日期待政府決定
立法會大樓喺今年七月一日遭到示威者衝擊同佔領，大樓建築同內部設施都受到唔同程度嘅破壞，令到大樓無法正常運作，立法會亦因而提早休會。大樓雖然立即展開修復工程，但立法會一帶不時成為戰場，令人擔憂能否如期完工盡快正常運作。不過，立法會秘書處尋日就大派定心丸喇，但幾時復會就仲要等囉。
系統陸續恢復運作 工程符合預期
秘書處尋日向全體議員匯報修復進度，交代現時嘅修復工作已經大致完成，但大樓地下嘅玻璃外牆就要等到出年二月先可以換到。另外，大樓各樣設施同系統都進行緊測試，之後就會陸續恢復運作，符合到之前所講以十月中復會嘅目標，而保險公司代表都去過大樓內作視察，確認立法會行政管理委員會所買嘅公眾責任保險涵蓋咗立法會正常事務，包括大樓內舉行嘅立法會同埋委員會會議等。
雖然工程符合預期，但現時仲未知會唔會十月中就復會，事關根據《立法會條例》第9（2）條，立法會新會期嘅開始日期係由行政長官決定同喺憲報公布，而立法會主席就會喺相關決定後，再按照《議事規則》第14條決定會議日期，所以就算工程完成得七七八八，都仲要等政府決定幾時復會，不過秘書處已將復修進度通知政府，似乎唔使等好耐就知幾時開番會喇！
卓妮