中環出更：長情養10蚊龜 林定國：生命價值無得計
好多人都有養寵物，烏龜係其中一個熱門寵物，易養吖嘛，又唔使每日帶佢落街行。一隻烏龜都好平吓，去金魚街行轉十零蚊就有交易。消委會主席林定國都有養龜，仲要由細養到大好有感情，已經唔係嗰十零蚊買得起，因為生命無價啊！
消委會尋日舉辦「消費文化考察報告獎 教學同行二十年」嘉許禮，問到林定國對邊個得獎組合最深刻，佢就覺得一個講手袋仲貴過烏龜，生命嘅價值嘅組合最吸引到佢。因為佢自己都有養龜，仲要由細養到大，養咗好多年，龜仔都由以前細過手心養到大大隻。佢話當年用好低嘅價錢喺水族館買返嚟，但咁多年嚟累積咗好深嘅感情，而呢份感情都係無價嘅。講到教年輕人理財，佢就講笑話最需要理財嘅咪佢太太囉，咁鍾意買手袋，但又點敢教老婆大人做嘢喎。
唔講唔知，原來城市大學校董會主席黃嘉純屋企都有養過龜，不過唔係佢養，係佢囝囝。佢話囝囝細個嗰陣喺水族館買咗幾隻烏龜返嚟，一隻五蚊咋！有一日其中一隻龜病咗，佢太太係好重視生命嘅人，就帶龜仔睇獸醫，睇咗成幾千蚊！囝囝問番媽咪隻龜五蚊o架咋，太太就話生命係唔可以用金錢嚟衡量嘅。佢又話由囝囝讀幼稚園嗰陣已經教佢正確嘅理財概念，仲教佢要珍惜食物，唔可以浪費，因為食物係爸爸媽媽買畀佢嘅，呢啲都係爸爸媽媽嘅血汗錢嚟。
黃鳳嫺 教小朋友正確理財觀念
消委會總幹事黃鳳嫺同該會教育部主任劉清平都在場。黃鳳嫺話依家嘅小朋友慣咗用八達通，加上有啲仲有埋自動增值，雖然係方便咗好多，但都好容易唔覺意會使大咗。不過，佢話好彩小朋友依家都多咗環保嘅概念，知道過度消費等於消耗緊地球嘅資源，所以會有節制。
佢覺得正確嘅理財同消費價值觀要由細做起，所以佢搞咗個二○三八地球人計劃，教小朋友正確理財觀念。點解係二○三八年？因為到咗嗰陣，依家啲小朋友都變大人，有消費能力，咁佢哋到時喺消費時都關心社會同呢個地球囉！
卓妮