政情：菲律賓在囚港人鄧龍威 獲「共享」四千蚊

阿Paul日前喺Facebook貼文，話喺財爺陳茂波（波叔）公布關愛共享計劃派四千蚊後，佢一直追問點解本身係香港永久居民嘅鄧龍威冇得「共享」？而喺立法會辯論期間，佢亦曾向波叔戲言，只要政府畀四千蚊鄧龍威，佢將會再「加碼」，以示認同政府同支持喺菲律賓冤獄嘅鄧龍威，但當時波叔只係微笑示意，未置可否。

謝偉俊畀多4000蚊打氣

最近有新進展嘞！阿Paul話鄧龍威哥哥Billy近日透過「鄧龍威關注組」通知，政府已向其弟鄧龍威發放四千蚊。阿Paul話先畀個like波叔，而佢亦履行先前承諾，以個人名義再「加碼」畀四千蚊，為鄧龍威打氣。

鄧龍威二○○○年喺菲律賓捲入藏毒案，被判終身監禁，而阿Paul一直協助鄧龍威。據了解，「鄧龍威事件關注組」喺「關愛共享計劃」二月一日接受申請首天，阿Paul同各方嘗試為鄧龍威向政府申請四千蚊，期望港府能體恤海外在囚港人，紓解佢哋在囚時嘅經濟困難，以解燃眉之急。