政情：鄉議局傾中學校董 有人自嘲冇建樹劈炮
新界鄉議局現時有兩間中學，分別位於元朗同大埔，兩校嘅校董人選由鄉議局委派同協商下產生。不過，有校董去信鄉議局話要辭任，仲自嘲了無建樹，唔通傾唔掂數？
李耀斌：主角同張學明關係密切
鄉議局大埔中學嘅校董會同學校管理委員會嘅任期喺上月尾屆滿，需要再委派同協商代表。不過，任期屆滿前一個月左右，就有校董等唔切去信鄉議局話要辭任，信中仲講到公務繁忙，但之後竟然唔係話未能兼顧，而自嘲多年來了無建樹，費事耽誤學校發展而要辭任校董喎。
鄉議局教育及康樂事務委員會主任委員李耀斌就話，見到封信用上「了無建樹」都覺得奇怪同突兀，但每個人都有自己方式同選擇用字喇！佢又透露，今次嘅主角同鄉議局前副主席張學明關係較密切，而張嘅校董任期屆滿後亦唔會再留任，估計令到主角再做都冇作用而辭任喇！