政情：搖美乞憐 黃之鋒獻完醜羅冠聰接力唱衰香港

反修例風波已經持續超過一百日，示威者同部分政治人物都積極爭取國際社會關注同支持，好似爭取美國通過《香港人權與民主法案》，其中黃之鋒同羅冠聰早就飛到美國進行游說，前者更率先喺上星期出席美國國會聽證會，促請美國國會通過《香港人權與民主法案》，又借機力數呢三個多月香港所發生嘅事情。

屢被鬧漢奸 羅話影響愈嚟愈細

雖然黃之鋒已結束訪美行程，但並唔代表唱衰香港嘅行為同樣告一段落，事關佢就話居於東岸嘅羅冠聰會繼續同美國國會幕僚保持聯繫，推動有關法案嘅立法進程，證明佢亂港嘅行動仲未停。

至於羅冠聰亦都喺網上講明要「接力游說」，事關佢本周內會出席美國參議院外交事務委員會嘅東亞小組聽證會，到時又會再講香港議題，直言要延續今次美國行程嘅成果喎。

羅冠聰更口出狂言，直指過去一行人被鬧無數次漢奸、叛國，但呢啲污名化對佢哋嘅影響愈嚟愈細喎，仲話今次行程收穫巨大嘅媒體關注，令到好多本身仲猶豫係咪支持聯署嘅美國國會議員落水，鎖定咗好多參眾兩院關鍵議員嘅支持喎。

美轉向年輕人埋手 打造禍港配角

時事評論員陳雲生直指美國干預其他城市或國家時都有一套劇本，但劇本需要有當地人嘅配合去增加說服力，好似過去就經常搵曾被官媒點名批評為「禍港四人幫」嘅民主黨（白鴿黨）創黨主席、有「李漢奸」之稱嘅李柱銘、有「民主阿婆」之稱嘅前政務司司長陳方安生，現時只係轉向年輕人埋手而睇上黃之鋒，至於主角外仍要有配角幫忙，所以就輪到羅冠聰上場。

陳雲生認為市民已經睇厭咗佢哋嘅把戲，而且稍為有人生經驗就知道佢哋所為係行唔通，大彈港府教育失敗，令到現今一代年輕人輕易畀外國利用。