中環出更：容海恩擲千萬 買樓畀兩老住
呢排反修例嘅示威遊行持續不斷，香港樓價都受到打擊，最近立法會議員容海恩（Eunice）竟然擲千萬買磚頭喎。
Eunice以一千一百萬元嘅價格，喺灣仔星街五號買咗個實用面積四百零八呎嘅單位，平均呎價近二萬七千元。
個單位嘅原業主二○一○年以一千一百七十五萬六千元購入，帳面貶值約七十五萬六千元，計落Eunice今次賺咗半成樓價有多喎。
Eunice結咗婚生咗個B女，依家仲佗緊第二個B，將來就會變咗一家四口，莫非今次係想換個大啲嘅地方，等小朋友多啲活動空間，但得四百呎點夠住呀？我哋問番Eunice，原來個單位並唔係買畀自己住，而係畀佢嘅爸爸媽媽住o架，仲話老人家住喺灣仔好多年，對附近社區比較熟悉，亦都住慣咗，所以兩老唔想搬得太遠，先有呢個決定。
對買入價感滿意
佢又話今次購入呢個單位，事前都諗咗好耐，之前一直都搵緊附近嘅樓盤，但未搵到滿意嘅單位，今次終於「覓到心頭好」！佢仲話個價錢低咗對自己嚟講係一件好事，對呢個價錢買到樓感到好滿意，仲話係一個長遠打算添！
卓妮