中環出更：快剪理髮店愈開愈多 劉玉棠：惡性競爭
現代人生活節奏急促，快餐文化大行其道，就連理髮業近年亦趨向「速戰速決」，「快剪理髮店」愈開愈多。香港專業髮廊管理協會會長劉玉棠話傳統嘅髮廊，為服務對象處理髮型需時，導致其他客人必須耐心等候服務，而設備同服務都盡量簡化嘅快速理髮，就可以為一啲要求唔高嘅客人，慳番好多寶貴時間，尤其適合需頻密修剪嘅短髮上班男、學生同長者。
卓妮日前喺香港地品牌大獎見到劉玉棠，佢話快剪理髮店舖位面積細小，可減少租金嘅支出，而一啲非理髮業界出身嘅投資者，眼見快剪理髮店利潤可觀，於是大舉開店，導致快剪理髮店嘅數目急速增長，為吸引客人不惜惡性競爭。
冇沖洗染電 謝嘉恩零意欲幫襯
佢話見過有快剪理髮店嘅基本收費竟低至二十九蚊，扣除租金同雜費支出，理髮師待遇之微薄實不難想像。佢認為理髮師唔單止要擁有一門手藝，亦應有相當嘅溝通技巧以助形成專屬嘅客戶群，並喺理髮期間留意客人頭皮同髮質狀況，從而作出相關建議，但快剪理髮店嘅運作方式，唔講求理髮師同客人建立關係，對行業嘅長遠發展，未必係一個健康嘅現象。
香港地品牌大獎籌委會主席謝嘉恩就冇幫襯快剪理髮店嘅意欲，因為欠缺沖洗設備，染髮或電髮無法進行，根本唔能夠滿足女士對秀髮造型嘅要求。佢又話曾經有人搵佢入股，投資開設快剪理髮店，但鑑於自己對呢行唔熟悉，結果都係打退堂鼓。
同場仲見到香港電腦商會主席梁定球同香港紅酒協會會長張耀成，而經營自助洗衣嘅特許經營協進會主席黃達強就喺警民衝突頻生嘅西環設有分店，生意難免受到影響。佢話試過有示威者進入店內，又有警察追捕扭作一團，幸而店內設施大致完好，只有閉路電視遭到噴黑，損失算係輕微咁話。
卓妮