政情：學咗10年手語 區建國搵太太練習
手語喺香港一直未被普及，健聽人士同聽障人士好難溝通，香港聾人福利促進會執行委員會主席區建國博士尋日出席活動時話手語唔簡單，自己學咗十年手語都未完全掌握，有時仲會搵老婆做練習對象添！
區建國話手語喺唔同地方都有好大分別，香港同廣州嘅手語已經唔同，自己學咗十年，香港版本嘅手語都仲未搞掂。佢仲自爆話平日喺屋企得閒都會用手語表達「今日唔返嚟食飯」嚟考吓老婆，順便當練習，笑住話老婆依家都已經被訓練到識得部分手語嘅意思啦！
手語溝通一定要有耐性
本身係聽力學家嘅區建國話香港好少人識得用手語表達，通常都係嚟睇症嘅病人先會用手語同佢溝通。佢話手語溝通一定要有耐性，自己有時都會遇到好心急嘅病人嚟睇症，手語表達得太快反而容易互相誤解，遇到咁嘅情況就惟有畀啲耐性，做多幾次手勢去解釋啦！