中環出更：何啟明個名「太普通」身份網上被假冒

網上騙案成日都有，好多人一唔小心就會墮入陷阱，立法會議員何啟明尋日都喺社交網站Facebook上載咗張相，話有人用佢嘅名同相喺通訊軟件Telegram群組冒充佢本人，仲講咗唔少嘢，何啟明知道之後就覺得好無奈，感嘆Fact Check真係好重要，提醒各位街坊要小心有人假冒身份，防止受騙喎！

喺相入邊呢個群組叫「搜捕曱甴隊」，有網民留言話「清潔運動照原定廿一號舉行」，有何啟明頭像嘅人就回應「有咩要幫忙？」隨即就有網民好熱情同佢打招呼，話「何先生、何律師你好」。

何啟明話全港都知Telegram特色係用假相假名，邊有人用真名真相回應，又自嘲話可能何啟明呢個名太普通，已列入網民選擇嘅常用網名，個個都叫何啟明咁點分呀！

事實上，何啟明撞名都唔係第一日嘅事，佢同深水埗區議員何啟明唔單止撞名，仲撞樣添！搞到啲市民喺街上見到兩人嘅橫額掛埋一齊，都分唔到邊個打邊個呀！

卓妮