中環出更：不問政見一視同仁 紀寬樂：盡力醫病人
醫生對待病人嘅態度，大家都認為以「醫者父母心」最為理想。不過，保良局前總理、心臟科名醫紀寬樂就認為，雖然醫生係要維護病人利益，但就好難將病人當作「子女」般看待。因為醫生診症最緊要客觀同冷靜，若果牽涉感情因素，就有機會作出錯誤判斷，所以醫生通常都避免同家人開刀做手術。佢又話醫護人員最重要係對求診者都一視同仁，無論對方持邊種立場同政見，都盡力予以適切治療。
紀寬樂日前以嘉賓身份出席愛心滿東華慈善晚會。佢話同東華三院上屆主席王賢誌係世交，為支持對方嘅慈善事業，佢將自己過去發表嘅文章輯錄成書，印製二千本義賣並將所得款項全數撥捐東華三院，但礙於自己手腳慢，著作面世之時王賢誌已經卸任，但佢同現屆主席蔡榮星都好老友，義賣仍按原定計劃進行。
蔡榮星：今年籌款壓力大
蔡榮星就話市道不景，加上貿易戰嘅陰霾底下，今年籌款嘅壓力確係好大，而佢就相當感謝紀醫生嘅善舉，東華三院一定會做好醫療教育等各項社會服務，唔會辜負各位善長嘅支持同信任咁話。東華三院副主席馬清揚都話時局不明，善長捐錢難免無咁疏爽，所以佢哋更加要諗下新意思，而東華三院旗下嘅社企，早前就派員工到台灣取經，繼而炮製出口味獨特嘅陳皮月餅。
東華三院總理馮敬安本身係從事紙張貿易，問到早前中秋前會唔會因為造燈籠嘅關係，令到紙張需求大增呢？佢就話自己嘅紙張生意，用途係以包裝為主，雖然唔清楚燈籠嘅用紙狀況，但佢話包裝用紙若果涉及食物嘅話，就需要有美國食物及藥品管理局嘅認證。
卓妮