政情：公民講場：洋葱菌風波 全港驚嚇 陳肇始乜都慢幾拍

市面上愈嚟愈多消毒藥水被驗出含「洋葱伯克氏菌」，受影響人數不斷增加。今次搞到社會恐慌，全因呢類低濃度消毒藥水並非喺法例規管行列，食物及衞生局局長陳肇始尋日認衰，話會檢視現時嘅規管是否足夠。今次消毒藥水出事，再次反映政府乜都慢幾拍，往往出事之後先至補鑊，而唔係防患於未然。之前爆發非洲豬瘟，陳亦都只係事後銷毀活豬。佢繼續咁樣後知後覺，大家真係自求多福喇。