政情：副手跳船 馮程頭痕 創新辦災難頻頻

去年四月成立嘅創新辦，前身係中央政策組，由林鄭上任後一手創立，主要工作係為特首及相關政策局提供政策支援，又會協助施政報告工作，被外界指係「影子政務司司長辦公室」。

馮程出任創新辦總監後，其丈夫、前經濟發展及勞工局副秘書長馮永業被裁定公職人員行為失當罪成判囚。至於馮程本身亦署任首長級甲一級政務官（D8）多年，仍未升正，可見創新辦真係新聞多多。

暫定年底正式離任

政府現時仍希望喺下月中公布施政報告，施政報告一向係創新辦主要工作之一，點樣解決土地房屋短缺問題，更加係重中之重。喺呢個時候，三個副總監之一嘅Donald證實上月已提出請辭，暫定年底正式離職。有指Donald過往喺創新辦，正正係主要負責運輸及房屋嘅研究。

Donald於一九九四年加入政府，曾先後在多個決策局及部門工作，曾任特首辦助理處長、勞工及福利局副秘書長，現時係首長級乙級政務官（D3），月薪達二十一萬元。截至今年六月底，D3或以上嘅政務官只有一百二十多個，而陳羿現時只有四十七歲，一直被視為「AO（政務主任）界」明日之星。有指Donald否認傳聞指其會轉到港鐵頂替已辭職的公司事務總監蘇家碧職位，只稱希望轉換環境，思考係咪一世留喺政府，並希望發展第二事業。

Donald回覆查詢時，證實已經喺上月底請辭，強調並非被挖角或與本屆政府不和，至今仍未有任何新工作安排，年底正式離任後，會休息幾個月，又戲稱多謝傳媒報道其離任消息，省卻佢搵工嘅麻煩咁話。

成立年半 7人請辭

其實，佢並非創新辦唯一離任嘅人員，創新辦成立短短約一年半，已有多名職員離任。創新辦回覆指，成立至今，共有六人已請辭，包括兩名高級政策及項目統籌主任及四名政策及項目統籌主任。計埋Donald，即係足足有七人跳船，創新辦呢份工似乎都唔多吸引呀吓！