政情：狄志遠升呢做狄公公 盼外孫做個好人
好多人生完小朋友都會望子成龍，但其實添咗孫都一樣會有好多期望，好似家庭與學校合作事宜委員會前主席狄志遠尋日就添咗一個外孫，喺Facebook話自己成為咗「狄公公」，仲寫咗一大堆對佢嘅期望，希望佢日後幫忙爭取老人院排期唔過三周、「生果金」增至五千蚊，唔通狄都想佢孫從政，幫佢爭取福利？
狄志遠話其實都係講吓啫，等外孫長大時世界都唔知變成點，所以將來做乜嘢都冇所謂，最重要係做個好人。至於個外孫取名「梁一予」，係佢個女同女婿改，係「第一個上帝賜予嘅小朋友」嘅意思。
好多嘢做 未必成日陪外孫
佢話自己都鍾意同小朋友玩，不過就未必好多時間陪外孫喇，一來佢個女係自由工作者，時間較多，會主力負責照顧一予，二來佢話自己好多濕濕碎碎嘅工作要做，分分鐘仲忙過個女，所以只能間中去幫手咁話。
至於未來會唔會叫個女生多個，佢話個女同女婿都鍾意小朋友，唔排除有呢個可能，但目前都係照顧好一予先再打算喇！