政情：莫錦貴上任三個月 未布置鄉局副主席房
新界鄉議局早已喺六月初完成換屆，而新班子已經上任咗一段時間，但鄉議局副主席莫錦貴嘅副主席房間仲同空置無分別，只有基本設備，唔講仲以為間房無人用。
冷氣未開到 Wifi都未連
莫錦貴間房連冷氣都仲未開到，要靠自然通風，而且佢嘅手機連大樓Wifi都仲未連到，房內只得空空如也嘅書櫃，工作枱上文具唔多，另外仲有會客嘅木櫈同茶几，睇嚟佢真係仲未遷入去辦公喎。
佢就話暑假期間鄉議局未有執委會舉行，唔使經常返去鄉議局大樓，現時先慢慢搬入去，目前只放咗兩舊木頭擺設喺房入面，未來仲會喺白雪雪嘅牆壁上掛油畫，但仍然停留喺想像階段，連畫都未揀好。
不過，佢就大讚房內嘅木櫈，原因係由鄉議局位於九龍塘嘅舊址搬過嚟，以前放喺大門口經過見到，似乎勾起佢唔少回憶，難怪特別鍾情呢兩張木櫈喇！