中環出更：唔放過自己友 鄧家彪抽麥美娟水
工聯會一向畀人嘅感覺相處好團結同融洽，但立法會前議員鄧家彪（Bill）就喺Facebook上一反常態，連黨友水都照抽，到底邊個黨友咁不幸呢？
叫人唔好爆粗 要心平氣和
阿Bill分享咗黨友、立法會議員麥美娟（Alice）所搞嘅活動，就係喺網上大搞直播，開咪聽電話直接同市民對話。呢個活動幾有新意，而且夠晒貼地，連阿Bill都話期待，但叫人唔好爆粗喎。
將爆粗同Alice拉埋一齊嚟，阿Bill好似有抽水成分喎。事關今年六月時傳出有議員同特首林鄭月娥閉門會面時爆粗大鬧「×街」，仲話「你試吓落街畀人×吖，×你老母呀！」Alice就被指係爆粗主角，但一直未有承認或否認。不過，再經立法會金融服務界議員張華峰未有熄咪講嘢，提及主角為Alice，真係水洗都唔清。
阿Bill就話今次呢個係工聯會所搞嘅活動，作為其中一分子當然要捧吓場，仲話呢類活動未必只搞一次，遲吓自己都有機會做主持，難怪期待喇！
佢又講到現時社會不滿多，擔心市民火遮眼而爆粗，直言各方都應該要心平氣和，不過爆粗都係真性情啫！咁係咪抽Alice水先？佢就笑笑口話「唔知呢」，答案呼之欲出喇！其實呢啲玩笑要夠老友先可以開，相信Alice唔會介意嘅。
卓妮