中環出更：老友記難出行 馬澤華盼政府增資源
「家有一老，如有一寶」，老友記係社會上不可缺少嘅一部分，不時需要大家嘅關心。嗇色園主辦嘅可富耆英鄰舍中心尋日舉辦修繕竣工啟用典禮上，嗇色園主席馬澤華期望鄰舍中心經過修繕後，再配合新增嘅樂齡科技產品，更加廣泛咁幫助到黃大仙區有需要嘅老友記，同時減輕人手負擔，取代人力支援，令長者服務能與時並進。
隨住人口老化，加上老友記愈嚟愈長壽，馬澤華發現唔少老友記行動上有困難，因此佢亦關注到老友記嘅安全問題，由於佢哋喺屋企出發到中心都有一段距離，假如老友記因為呢個問題而未能參與活動或者課程，人身安全就會出現危機。佢又提到始終經費有限，一旦唔能夠滿足某一個中心使用樂齡科技產品，提供相關服務，但同一時間又證明到有需要用嘅話，希望政府可以係撥款方面寬鬆啲，畀多啲資源，額外增加撥款基金，讓嗇色園添置樂齡科技器材，例如輪椅咁，方便老友記出入。
李家仁提醒要同長者互動
黃大仙區議會主席李德康、嗇色園副主席黎澤森等人都有嚟撐場，當然唔少得嗇色園「關愛大使」李家仁醫生。李家仁話其實樂齡科技唔單止可以幫到老友記，同老友記嘅互動都好重要，因為要親近一個老人家都唔係一件容易嘅事，需要花好多心機先做到。佢又大讚可富中心為老友記提供一個好好嘅地方，畀大家一齊玩同學嘢，點都比一個獨居老人留喺屋企好好多，佢解釋，因為寂寞容易令人衰老、生病，如果老友記開心嘅話，精神都會好啲，自然訓都訓得好啲。
抱病到場嘅嗇色園黃大仙祠監院李耀輝博士就話，佢由五十幾歲開始喺嗇色園服務，到依家差唔多八十歲，又話能夠為社群服務，係宗教上嚟講係一種福分，卓妮就祝佢身體健康，等佢繼續為社區服務。
卓妮