政情：安排惹怒區議員 對話會取消安檢
全港四百多名區議員上周獲邀出席今日舉行嘅對話會，與特首林鄭月娥同部分官員會面，但安排惹起唔少區議員不滿。據了解，當局終於喺尋日從善如流，但都撲熄唔到區議員嘅怒火。
元朗區議員李月民話，前日收到通知話唔准遞信同帶示威物品，但尋日傍晚就獲通知取消檢查隨行物品安排，體積唔大嘅物品都唔會被阻帶入場。佢認為呢個改動與傳媒報道，同埋佢去信有關部門反映後嘅結果。
李月民：搞到好似賊咁低賤
佢更大嘆，之前做法令人唔舒服，有區議員得知有關安排後更決定唔參加對話會，直指政府搞到區議員好似賊咁低賤，違背活動和平、理性同尊重嘅目的。佢仲話依家見林鄭月娥已經係負擔，區議員願意會面仲要扮嘢，好彩現時肯接受意見，但聽落仍然一肚怨氣喇！
今次齋見區議員都節外生枝，李月民話遲吓落區仲大鑊，因為搞到最熟悉區情嘅區議員都唔願帶路同協調，到時唔搵人圍林鄭已經偷笑喎。