中環出更：黃之鋒又唱衰香港 赴美現身公聽會
香港眾志秘書長黃之鋒呢段期間頻頻唱衰香港，多次呼籲美國干預香港事務，而尋日就現身美國國會出席《香港人權與民主法案》聽證會，促請美國國會通過《香港人權與民主法案》。
黃之鋒發言時重提，曾經話香港由「一國兩制」慢慢變成「一國一點五制」，但今時今日香港已經危險地接近「一國一制」，認真係危言聳聽。
想向西方施壓 唔賣武器畀警隊
佢又把握機會數一次呢三個多月嘅事，特別講到七二一白衣人襲擊市民，而警察又遲遲未到場，又批評警察呢段期間點樣濫用暴力，試過單日發射八百枚催淚彈，數量遠超五年前違法佔領運動中發射八十多枚，更大話警方用由西方購入嘅武器，好似催淚彈、布袋彈等去對付示威者，擺明想施壓唔好再出售武器畀警隊喇！
而對於政府已經正式撤回修例，佢又話已經太遲變得無意義，仲話示威者希望有根本性改變，咁講法係咪想推翻政權呢？
另外，末代港督彭定康尋日亦都出席活動，就再次對香港事務說三道四，大話北京必須要畀香港足夠空間，去同示威者達成合理妥協，而且北京亦都要明確表明仍然恪守中英聯合聲明，重申香港係五十年不變喎。
卓妮