中環出更：社工出身吳宏增畀人兇到慣
正所謂「助人為快樂之本」，幫到人唔單止人哋受惠，自己都會好滿足。今年係香港社會企業總會（總會）成立十周年，多位創辦人同理事對幫人都有一番感受。
總會創會理事吳宏增係社工出身，佢後生啱啱畢業嗰陣做學校社會工作，要服務邊緣青年。佢話打就冇畀人打過喇，但就有畀邊青兇過。之後佢又有做更生人士工作，佢話有時更生朋友對佢哋啲服務唔滿意都會發脾氣，但佢就話兇兇吓就慣嘞！佢仲話有唔少曾經犯法嘅後生仔，加入社企工作之後，由完全無生活目標，到開始融入工作，會緊張份工，佢見到佢哋嘅改變都好感動。
黃靜虹教少數族群中文
社企「WEDO Global」聯合創始人黃靜虹（Eva）就化身老師教少數族群中文，佢話教小朋友最重要嘅就係同佢哋建立關係。因為語言不通，Eva仲要用身體語言，指手畫腳，又玩遊戲，又播卡通片去教小朋友。有次佢仲同一班小朋友去清真寺，佢要包頭同着長褲，都係一個幾新嘅體驗嚟。佢周不時都會搞啲戶外活動畀小朋友，好似上次就去咗大館，附近仲有香港嘅第一間清真寺添，佢話希望啲活動可以畀小朋友了解多啲香港歷史嘅文化。
總會會長郁德芬博士就話其實都可以喺殘疾人士身上學到好多嘢。佢本身係做心光盲人服務，社企八個職員入面有五個有色盲或者嚴重視障。佢話依家啲人成日都好易就唔開心，但當佢見到啲視障人士睇唔到嘢都咁努力工作，佢自己嘅困難都變得微不足道。佢又話社企嘅目標係「助人自助」，等殘疾人士同弱勢社群可以有尊嚴，賺到應得報酬之餘仲可以掌握技術、服務社會。
卓妮