政情：邱達根童年荔園玩鬼屋 大個仔巡視設施
荔園係唔少人嘅童年回憶，好多人細個都會去玩機動遊戲同埋鬼屋。下個月就係萬聖節，已故荔園老闆邱德根嘅兒子邱達根（Duncan）出席一個開幕禮時，被問到細個有冇去過荔園嘅鬼屋，佢就話梗係有，當年會同成班同學一齊行入鬼屋探險（口架），仲講笑話自己對鬼屋熟到瞌埋眼都識行，到後期入去鬼屋已經唔止係玩，最大嘅任務係巡視吓啲機器有冇損壞，如果有嘢需要維修，就通知維修部檢查吓。
佢又話，細個約埋同學仔一齊入荔園玩，都會睇吓動物、玩吓過山車，仲指定要玩碰碰車，當年同啲同學仔分組玩，互相鬥撞，不知幾開心，又會抽時間去睇吓動物。
盼重現當年環境 緬懷一番
Duncan依家已經做咗荔園主席，唔知佢最大心願係咪重建荔園呢？佢就話，喺香港覓地比較困難，所以如果有合適場地，可以放幾個攤位遊戲，布置吓當年樂園嘅環境出嚟，等大人可以緬懷吓，又可以帶啲小朋友去玩吓，大人細路都開心，佢就已經好滿足咁話。