政情:林琳入院割息肉 戴住病人手帶開會

荃灣區議員林琳早前因為輸卵管有水囊,曾經入院做手術,原來佢早幾日再次入院,但今次係割腸道息肉,但係佢入院後,竟然戴住條手帶順便開埋會,翌日出院後,轉個頭又可以即刻落區做嘢,真係頻撲。

林琳話,佢係星期三(11日)早上八點入院嘅,因為做腸道手術,需要清空腸胃,一入院飲完清腸胃嘅藥,十點仲順便開埋間醫院有關低收費病床嘅會議添。由於佢入院做手術,所以着得好求其,着住短褲拖鞋,仲戴住條病人手帶,一開始都冇人知佢有份去開會。

成日有小病痛 打算中醫調理

佢話,當日下午約四點半開始做手術,好快就完成,晚上十點就食得嘢嘞,佢之後仲喺病床上做啲文書工作,做到凌晨四、五點,第二日早上出院後,適逢中秋前夕,仲即刻落區派嘢,之後仲出中環開會。雖然做腸鏡係小手術,但佢近期都成日有小病痛,都打算睇吓中醫調理吓身體咁話。

第一手消息請下載on.cc東網iPhone/iPad/Android/Windows Phone Apps