中環出更：家庭迎新生 梁天富三年抱三勁開心

其實善德基金會最近舉辦咗一個問答比賽，日前就特別搞咗個答謝晚宴，當晚有基金會高層及校長聯會主席出席。講起問答比賽，當然要問下梁天富以前有冇參加過啦，佢就話梗係有喇，小學嘅時候仲係數學代表隊，話自己轉數快，唔使諗就答到，又好自豪咁話自己三年班嘅時候就贏四年班添。真係好威水咁喎！不過問番佢既然計數咁叻，有冇話生幾多個先停呀，佢就笑自己計數叻，但喺生仔方面就計錯數，要停吓休息吓先喎。

湯修齊中學天文問答比賽攞季軍

基金會永遠名譽會長施振忠、副主席鄭穩偉、香港島校長聯會主席方仲倫、九龍地域校長聯會主席張漪薇及新界校長會主席邱少雄都有支持當日嘅晚宴。轉個頭見到家庭與學校合作事宜委員會主席湯修齊（Henry），Henry話自己讀中學時，好鍾意天文，加入咗天文學會後，仲同同學仔一齊參加聯校嘅天文問答比賽，全港六十隊佢哋就攞第三添，但依家已經冇咗呢個比賽喇，話因為光污染太勁，已經睇唔到星星，加上依家啲小朋友要參加咁多課外活動，仲要打機添，又點會觀星喎。聽落都真係幾可惜呀！

邱少雄（左）、張漪薇（中）及方仲倫（右）都有出席晚宴。

溫佩麟（左）笑自己比賽從未贏過，右為鄭穩偉。（溫國佳攝）

同場仲有另一個基金會總理溫佩麟，佢就話自己冇乜參加過問答比賽，反而就有玩過朗誦同辯論，講笑話從來都冇贏過，但就教路話，跟住學校老師教嘅就實冇錯！唔知咁係咪代表佢冇跟到老師教嘅嘢呢？

卓妮