政情：業界吊緊鹽水 自己肥咗靚咗 張宇人：政治不正確

反修例引發嘅示威遊行至今已經足足三個月，重創香港經濟，訪港旅客「插水式」下跌，各行各業嘅營業額都受到重創。好多酒樓、食肆都相繼結業，的士同小巴司機都生意難做、生意額大跌，大家都嗌晒救命，多個業界都走出嚟叫政府幫手。見到各行業生計不保，政府近排推出支援中小企嘅最新措施，等大家喺呢段時間內可以先還息不還本。

Tommy日前出席一個論壇都講到飲食業、零售業同旅遊業一環扣一環，依家生意額全線下跌，仲話大家心情都唔好，業界個個想死。但其實佢喺六月九日爆發反修例行動就已經唔喺香港喎，唔通去咗「避難」？

原來帶隊去各地視察

原來佢嗰段時間帶咗業界去各地視察，六月頭去福島同東京、七月去中國東北、八月頭去南京，最後喺八月尾同老婆去冰島玩咗轉添，去咗咁耐旅行，唔怪得咁精神啦！放完假返嚟，佢話眼見業界咁苦惱，但自己竟然肥咗、好樣咗、精神咗，跟住就自嘲「政治不正確」，相反應該要憔悴啲、瘦啲，業界先會覺得佢一齊共度艱辛喎。

身兼行政會議成員嘅Tommy話，因為今個年度嘅行會提早放完暑假，要趕返嚟開會，返嚟之前佢同老婆坐郵輪去冰島玩咗十五日。佢話冰島可以揸車周圍玩，人口唔多所以見羊多過見人，天然景觀仲好靚，仲話自己好鍾意坐郵輪，早幾年都同老婆坐郵輪去新西蘭玩，認真識歎。

睇到香港新聞唔開心

但佢話今次冰島之旅玩得唔盡興，事關每次一收到信號就會睇番香港啲新聞，睇完心情都唔係咁好，但因為一早就已經計劃好，所以就唔可以「甩老婆底」啦！