中環出更：田北辰憤怒了：散播仇恨嘅人係懦夫
喺反修例行動至今，出現好多網上起底同網上欺凌事件，立法會議員田北辰尋日喺Facebook貼文，批評有啲人透過各種手段，去散播仇恨同發洩，直斥呢啲係懦夫行為，仲話希望文明人反思，不文明嘅懦夫係咪仲係同路人？
田北辰話一直尊重和平集會，反對暴力示威，堅持譴責暴力，原因係暴力只會帶嚟仇恨，而仇恨只會不斷蔓延，冇對錯之分，佢亦擔心仇恨帶嚟嘅傷口遠比暴力本身嘅傷害更大。
佢話網上不斷有人將警員家屬起底，號召校園欺凌，仲有人到警員婚禮搗亂，反問支持嘅人，呢啲行為同爭取公義有乜嘢關係？又話：「堵佔道路，你們說是為了公義；破壞設施，你們說是為了公義；暴力衝突，你們說是為了公義；那麼校園欺凌、搗亂婚禮究竟和爭取公義有甚麼關係？以各種手段，去散播仇恨和發洩，我只能總結為懦夫行為。」
話唔會對政府錯失視而不見
對於呢啲情況，佢希望真心愛香港而不滿政府嘅市民反思，用呢啲行動爭取，即使成功，剩低一個充滿仇恨嘅香港係咪大家想要？又希望文明人反思，不文明嘅懦夫係咪仲係同路人？佢亦話唔會對政府嘅錯失視而不見。
依家好多議員都諗緊辦法要港鐵公開831太子站CCTV片段，佢話據佢所知，片段將會保留三年，仲話會努力協助追查真相。
卓妮