中環出更：日本搵食艱難 譚鎮國兩粒鐘先歎到豬扒飯
好多人都鍾意去旅行，之但係人在外地，若果遇到突發嘢會點呢？尋日喺沙田馬場其中一場賽事係東華三院挑戰盃，而場景布置嘅主題係度假，唔知道一班董事會成員去旅行嗰陣又有無試過有啲「小意外」呢？
有人將去日本叫做「返鄉下」，副主席譚鎮國都好鍾意去日本o架！佢話有一次佢同一班董事會成員去日本玩，嗰日咁啱遲咗起身，就決定去銀座食炸豬扒。點知啲餐廳一係唔開，一係就好多人排隊，要排成個幾鐘，佢哋搵咗兩個鐘都未食到嘢啊，認真陰功囉！最後佢哋餓到頂唔住，求其見到間餐廳就入去醫肚。佢仲話如果帶埋囝囝去旅行多數會揀台灣或者泰國，因為菲傭姐姐唔使簽證。佢話囝囝啲日用品太多，無姐姐幫手真係搞唔掂！
文頴怡杜拜揸四驅車撞板
另一位副主席文頴怡好鍾意冒險，去過非洲睇動物同中東沙漠。佢話上次去杜拜沙漠騎駱駝之餘，仲玩埋四驅車，要自己揸o架！！教練叫佢跟住前面架車，但佢就諗：「架架車都行嗰條路，條路唔會冧咩？」所以佢就偏離咗少少本身條路，點知就出事喇！隔籬條路斜咗落去，佢就連人帶車打咗個觔斗，好彩個人無事咋，下次要乖乖哋聽教練話喇！
去沙漠可能太刺激，有人就鍾意休閒啲，好似都係副主席嘅韋浩文去旅行通常都係返加拿大，因為佢喺嗰邊大，生活咗成二十幾年，佢話夏天返加拿大好舒服，又多朋友，唔使用腦諗要去咩景點。
最搞笑嘅係，咁多年嚟佢都無喺加拿大呢個滑雪大國滑過雪，原因竟然係嫌麻煩！真係第一次聽！佢話細個冬天都係同朋友喺屋企打機或者出去唱K，係個小宅男嚟。反而佢太太就係運動健將，又滑雪又滑浪。不過韋浩文好有原則，就係點都唔滑雪，追人嗰陣睇戲食飯咩都得，就係唔肯滑雪。
卓妮