政情：盧文端飛上海怕遲到 提早兩個半鐘到機場
搭飛機最怕遲到，呢排香港交通不時受阻，就連香港中華廠商聯合會名譽會長盧文端都要提早好多出門，佢尋日搭原定下午一點九嘅航班前往上海探女兒，平時早上約十一點半到就得，但今次好驚遲到，就提早兩個半鐘到機場，佢話係秘書叫佢唔可以咁遲去喎！
門外打蛇餅 應開多啲入口
盧話，依家去機場都唔知幾時會塞，加上喺機場外要檢查登機證同身份證，但只有兩個入口畀入，門外打晒蛇餅，天氣又熱，相信外國旅客對呢個安排有意見，覺得就算要檢查，都應該開放多啲入口，否則影響旅客對香港印象。
佢又話，機場內有唔少防暴警察駐守，氣氛好緊張，「嚟到機場門口咁多警察、警車」，佢依家最想學生哥快啲返學，香港社會盡快回復平靜。對於政府事隔兩個幾月才撤回修訂《逃犯條例》，佢覺得撤回都係好事，但「遲咗少少」，政府都有誠意，惟權威亦因而「差咗」，不過希望學生同政府可以坐低傾吓，政府做得唔夠好，建議多建青年宿舍、公屋同派錢等，改善民生咁話。