政情：鄧以海率海關打羽毛球 為癌症兒童籌得逾220萬元
海關關員要有一定嘅體能要求，原來連羽毛球水準都有番咁上下。尋日海關關長鄧以海就率領海關羽毛球代表隊，為非牟利兒童癌病互助組織「生命小戰士會」籌款，成功籌得逾二百二十萬元，成績相當唔錯。
何珮珊主持亮燈儀式
尋日多個政府部門同機構一齊落場比併羽毛球，今次其實係海關大搞慈善羽毛球錦標賽，一共有十二支隊伍參加，就連入境處都組隊參賽，多名政府官員包括入境處處長曾國衞、海關副關長何珮珊、食物及衞生局局長陳肇始及副局長徐德義、保安局副局長區志光等都有份出席，其中何珮珊、徐德義同區志光等人仲喺開幕式上主持亮燈儀式添。
最終海關同入境處分別奪得「獎盃賽」嘅亞軍同季軍，成績絕對唔失禮。鄧以海就話，今年海關成立一百一十周年，所以特別構思同慈善機構合作搞籌款活動，而海關未來會繼續為國家同香港嘅繁榮穩定作貢獻，仲會繼續參與公益活動。齋睇今次呢個比賽都知海關講得出，做得到喇。