政情：「劍魚」有回魂 林超英：減弱得好快
每次打風打得勁就有得放假，好多打工仔同學生哥都好期待，熱帶低氣壓「劍魚」早前離開香港後，原本預計會「翻兜」再靠近香港，之前聽講「劍魚」回魂會勁啲添，點知等吓等吓又好似冇咗影咁。天文台前台長林超英就喺社交網站引用地下天文台台長嘅資料，解釋「劍魚」到底去咗邊。
稱感謝地下台長畀料
林超英話，天氣報告後來冇咗「劍魚」嘅消息，原因係佢減弱得好快，能量被另一個颱風「玲玲」吸收咗，其實衞星圖片仲見到「劍魚」嘅殘餘，依然保持有螺旋雲帶，而且真係返咗香港附近o架。原來「劍魚」真係回魂，只係弱到大家唔多覺，唔怪得大家冇假放啦！
林超英今次係引用咗地下天文台台長嘅資料，仲話多謝對方提供畀大家添，睇嚟民間智慧都好值得大家留意多啲！