政情：廣西壯族自治區錯稱廣西省 新聞處新處長 秉承甩轆傳統 一上任即撞板

鄭偉源喺上月二十九日上任，接替明天起出任香港郵政署長嘅前政府新聞處處長朱曼鈴。朱掌管新聞處只有一年半，時間唔長但甩轆事例就一大籮，所以提早走人可以話唔意外。

前處長朱曼鈴醜事一大籮

朱在任期間表現欠佳，連政府都曾經公開批評多次傳媒採訪安排有改善空間，而要數到其任內最具爭議嘅一次，相信就係修訂《逃犯條例》引發連場示威衝突初期，傳媒多番追問當時久未露面嘅特首林鄭月娥，但新聞處所發出嘅答問內容竟然將傳媒提問過濾，敏感問題一律失去蹤影。

至於今次鄭偉源嘅甩轆同樣關林鄭事，翻查記錄，上周三嘅新聞公報交代林鄭即將出發廣西省南寧市，而新聞處前日上載林鄭訪問時，同樣指林鄭喺廣西省南寧市出席會議，但同日公布嘅新聞稿又指會議喺廣西壯族自治區南寧市召開，到底廣西係省定係自治區，抑或兩個說法都無問題呢？

錯咗幾日都無人發現更正

然而睇番內地官方網頁嘅資料，指全國劃分省、自治區同直轄市，一共有三十四個省級行政區，包括廿三個省、五個自治區、四個直轄市同兩個特別行政區，當中自治區係少數民族聚居地區，而廣西則為五個自治區之一，全稱為廣西壯族自治區，似乎新聞處將廣西稱為「廣西省」並唔正確，最離譜係有關錯誤出現咗幾日都無人發現兼未作更正。

政府發言人尋日就認衰回覆指，有關「廣西省」嘅提述並不準確，屬手民之誤，已作出修正。

講真嗰句，今次事件足見新聞處未有吸取教訓，並無好好校對資料，呢種工作態度，難怪會淪落到甩轆當食生菜嘅境況，所以換咗鄭偉源都無補於事，只會繼續甩轆。