政情：陳帆落區見人 被柯仔爆畀女圍
近期示威浪潮持續不休，被批評不作為嘅政府日前終於有所行動，話官員會走入社區同市民對話。運輸及房屋局局長陳帆似乎非常聽話，尋日就走入觀塘區，更被身兼觀塘區議員嘅立法會議員柯創盛（柯仔）大爆過程畀女圍，咁艷福無邊同受歡迎？
柯仔尋日連同多名觀塘區議員捉陳帆落區，希望直接向陳帆反映當區嘅議題咁話，而且行程相當緊密，去咗彩福邨、寶達邨等七個地點，睇嚟真係有唔少地區問題等住陳帆跟進。
柯仔更大爆，陳帆落區期間畀女圍，真係睇唔出陳帆咁有異性緣喎！不過所講嘅其實係一班婆婆街坊，搵陳帆集郵之餘，更把握機會直接反映意見。不過陳帆全程都將條呔收入恤衫袋中，其實收埋條呔又唔會涼爽啲，到底點解要收埋呢？真係令人費解嘞！
未見最不滿政府嘅一群 欠全面
講真嗰句，官員多落區，不再離地實屬好事，但如果只見長者，而見唔到對政府最為不滿嘅一群，聽到嘅意見就點都唔夠全面，唔通政府所謂嘅走入社區對話，就僅止於此？