政情：政府遲未公布會期 立會月曆印製受阻

按照往年做法，立法會都會喺休會期間印製下一個立法年度嘅月曆，當中會列明該立法年度嘅所有大會、政府幾時宣讀施政報告同財政預算案等日期。

列明要項日期 近年9月就派

此外，月曆近年都喺九月份派發，所以月曆一般會以十月份開始，到下一年嘅九月份結束。

據了解，立法會會議日期係根據政府所提供嘅時間而定，而現時政府遲遲未定出新立法年度開始日期，所以拖延咗立法會印製月曆嘅工作，進度已經比往年有所落後，似乎上年派發嘅立法會月曆，用埋今個月後，要等吓先有新o架喇。

睇番去年嘅政府憲報，政府喺七月中分別就一七至一八立法年度結束日期同一八至一九立法年度開始日期刊憲。不過今年七月中，只有就一八至一九立法年度結束日期刊憲，到今時今日仍未就新一個立法年度開始日期刊憲，唔通政府無信心立法會可以如期運作？