政情：全家去旅行 楊全盛事忙被撇低
暑假係最啱去旅行嘅日子，不過香港電競總會會長楊全盛（Eric）早幾日就喺社交網站呻，屋企人去晒旅行，自己冇得去，原來佢啱啱忙完早前嘅電競節，嚟緊準備飛日本睇吓啲虛擬實境（VR）裝置，加上仲有好多唔同會務要處理，忙到完全抽唔到身，所以屋企人就決定撇甩佢，去惠州玩成個星期，由得佢留喺香港忙到踢晒腳喇！
外國選手嚟唔到 國際賽變本地賽
近期社會局勢比較亂，點解仲有咁多活動要忙呢？Eric解釋，好多活動都係成年前就開始籌辦，例如贊助、租場地等，都一早處理好晒，所以好多時即使明知會有影響，都「焗住搞」冇得取消，好似之前搞電競比賽，本身邀請咗四十隊世界各地選手參加，最後好多都拎唔到簽證而嚟唔到，得番四隊出席，國際賽事變本地賽事，搞到Eric都好唔開心。聽落認真慘呀！
至於電競節，Eric估計人流比過往少咗三至四成，好彩嘅係生意額唔算跌好多，估計少咗嗰啲人流係「齋睇齋行」嘅人居多咁話！