政情：鳳凰衛視甩轆 誤報黃之鋒再被捕
修訂《逃犯條例》風波引起連場示威衝突，幾乎每次都有人被捕，其中鳳凰衛視同環球網等傳媒，尋日報道指，喺晚上九點半左右，警方喺銅鑼灣拘捕香港眾志秘書長黃之鋒，指佢「參加未經批准的集會」，不過報道出街約半個鐘後，香港眾志副主席鄭家朗回應查詢時否認嗰個人就係黃之鋒，直指該報道係假新聞。黃之鋒尋晚約十一點都喺社交網站回應話嗰個唔係佢。今次鳳凰認錯人報錯新聞，真係瘀喇！
保釋中 要守禁足令宵禁令
其實警方喺「八三一」前夕，即八月三十日，一度進行大搜捕，其中一名被捕人士就係黃之鋒，指佢涉嫌喺六月二十一日煽惑他人圍堵灣仔警察總部，仲即日下午已經提堂，其後雖然可保釋，但就要守禁足令同宵禁令，即唔准去警總附近，同埋晚上十一點至翌晨七點要留喺屋企等。
黃疑自認係反中亂港分子
黃之鋒喺社交網站就承認，自己尋日下午的確去過銅鑼灣，但無被捕，又疑自認係「反中亂港分子」，批評誤報嘅媒體咁都認錯，專業性受質疑。