政情：政見唔同被起底 高松傑斥幼稚

盜資料代訂酒店捐器官

高松傑話不斷收確認電郵，先至知道有人盜用自己嘅個人資料，四出訂酒店房間、食肆留枱、器官捐贈、就連購物同美容服務都有，令佢不勝其擾，但佢就唔擔心有人用佢嘅個人資料去借錢，因為財務機構要有住址證明同身份證，先至批核借款。但佢話既然有人冒用佢嘅身份，自己嘅個人資料亦好大機會於某啲網絡討論區上流傳。

雖然佢唔能夠確定犯案者係邊個，但相信事件起因，係同個人政見有關。佢認為大家生活於多元社會，意見分歧實屬平常。倘若遇上唔啱聽嘅意見，文明嘅做法係以理服人，而唔係將人家嘅私隱公諸天下，或冒用身份玩大整蠱。佢批評藉住起底就可以迫使人家滅聲，做法相當幼稚。