政情：麥潤培蟋蟀蠶蛹送飯

話說日前佢喺社交網站上載咗一幅碟頭飯嘅相，同網友分享話呢個係佢嘅午餐，遠睇碟飯有堆黑色嘢，近睇原來係蟋蟀同蠶蛹。

仲話竹蟲最好味

唔係呀？咁得人驚！唔單止有蟋蟀同蠶蛹，佢仲話試咗蠍子、草蜢同竹蟲添！真係咁好味？佢話大蠍子有啲蟹肉味，但因為好難咬，所以就唔好食，佢仲食到個嘴都損咗，而細蠍子就有啲鹽嘅味道，好食過大蠍子，又話竹蟲係最正、最好味又香口。

啲昆蟲咁核突同嚇人，但麥仔竟然話唔會好難入口，話只要突破到個心理關口自然會接受到，因為連少少臭味都冇。原來呢啲昆蟲係零食嚟，佢朋友喺泰國帶番嚟嘅手信，又話自己好鍾意食呢類小食o架！

點解有咁多嘢好食，佢偏偏走去食蟲呢？原來佢係因為有科學家同地理學家話全球未來可能有糧食危機，人類第時或者要食蟲維生同充飢喎。聽佢咁講，係咪諗住早啲適應呢？