中環出更：葉建源教非華語細路寫龜
大家覺得邊個中文字最難寫？一定係一啲又多筆劃又唔常見嘅字，而立法會議員葉建源就竟然教啲非華語（Non-Chinese Speaking）細路寫個龜字。
象形圖案 想引起小朋友興趣
葉建源尋日喺立法會同兒童議會嘅小朋友會面，了解吓非華語學生學中文有乜嘢困難同壓力。當中仲有兩個巴基斯坦同菲律賓籍嘅同學添！葉建源曾經做過中文老師，好自然老師上身，仲即席教咗班小朋友寫個龜字。點解要教個龜字呢？好多筆劃喎，點記得呀？佢就話龜字係一個象形圖案，係一隻活生生嘅烏龜，希望可以提起同學學中文嘅興趣咁話。
見佢真係好畀心機教o架，喺塊白板上面寫咗兩個龜字，等小朋友可以睇得清楚啲。之不過，個龜字咁難，唔知啲非華語小朋友有冇睇到一面黑人問號呢？
葉建源仲話，相信如果非華語小朋友可以喺讀幼稚園開始學習中文，再加上課後活動同埋教育埋啲家長，咁佢哋就可以融入學校生活多好多嘞！
卓妮