政情：家姐爆袁彌明細個暗戀「俊興」
前港姐、人民力量前主席袁彌明（Erica）近日拉埋家姐袁彌望（Mimi）一齊拍短片，點知竟然畀家姐爆料，公開佢細個暗戀嘅對象，到底係邊個人咁神秘呢？
鏡頭後先講Erica係咪校花
Mimi邊整頭髮邊話全家都好似樣，但媽媽先係靚嗰個，而Erica又最似媽媽，咁咪當然係最靚嗰個囉！Mimi讚完Erica天生靚啲後，仲話Erica係貪靚嘅人，淨係睇佢點面對鏡頭就知。既然咁靚女，一定有好多男仔追啦！畀人問到細個邊個多人追啲、Erica係咪校花時，Mimi就懶神秘話要鏡頭後先肯講喎。
點知鏡頭一轉，Mimi就爆出比校花更勁嘅料，就係Erica細個暗戀嘅男仔叫「俊興」，呢個俊興又係乜水呢？Mimi話細個卡通片小忌廉好流行，當中有個男角色叫俊興，而佢就讀小六時帶咗一班同學仔返屋企玩，其中有個男同學生得幾靚仔，於是Erica當日就堅持呢個男仔係俊興，仲「俊興、俊興」咁叫佢添！Mimi仲話Erica到依家都仲好鍾意小忌廉o架！佢都好長情喎。