千祈唔好以為立法會仲未完成修復兼且正值暑假就冇嘢好做，其實有啲工作係仍在進行中，例如嚟緊將會再有外訪，今次係英國英聯邦議會聯合會邀請，佢哋會喺今年十二月十六至十八日，喺澳洲珀斯舉辦一個現代奴隸制項目下嘅工作坊，內容將會係關於議會委員會喺打擊販運人口活動，以及強迫勞動等方面上嘅角色，邀請香港立法會議員參與，名額兩個，現階段正徵詢立法會保安事務委員會各委員，睇吓提名邊個議員去。
之不過，唔係所有議員都參加得，聯合會表明只限參與過販運人口活動、現代奴隸制項目嘅議員先可以去，翻查資料，比較近期就有立法會紡織及製衣界議員鍾國斌（Felix）喺今年三月底參加過，當時佢去咗英國倫敦參加現代奴隸制項目下嘅法律起草研討會。
查實三月個研討會原本都係可以提名兩名議員出席，但最終得Felix一個去，睇落反應麻麻，至於今年底嗰個研討會就本月三十日先截止，唔知會唔會又係只得Felix去呢？