政情：區會動議傾港鐵落閘被拒 新同盟發譴責聲明慢半拍

話因全力跟進尚德邨毆鬥事件

查實新同盟有六個西貢區議員，包括身兼立法會議員嘅范國威（Gary）、林少忠、呂文光、梁里、黎銘澤同鍾錦麟，全部都係交通運輸委員會委員，點解發譴責聲明都慢半拍？Gary解釋，前日因尚德邨發生毆鬥事件，該黨全部時間精力都跟住呢件事，例如陪事主去醫院、警局等，所以搞到尋日先有時間出聲明，佢仲話哪吒只係要求港鐵提供資料，而新同盟係明確反對港鐵落閘，認為佢哋嘅動議比較堅實。

Gary話委員會原定下次開會日期係下月十九日，到時先傾實在太耐，擔心港鐵會喺短期內再關站，一方面打壓遊行，另一方面影響居民，所以前日喺特別會議上就由鍾提出臨時動議，雖然被拒，但嚟緊會喺下月四日區議會大會上再提出，希望到時可以更符合迫切性嘅問題，可以喺會議上傾咁話。