政情：觀塘遊行後 何啟明搬磚
早前觀塘有示威遊行，部分人偏離遊行路線行咗去九龍灣，仲演變成衝突，期間示威者又掟磚，又拆欄杆，有啲人仲鋸咗條燈柱落嚟。翌日，身兼觀塘區議員嘅立法會議員何啟明竟然又落去搬磚？
擔心有車輾過好易反
係就係搬磚，不過今次佢係幫手執番乾淨條馬路，並唔係拎嚟掟。佢喺社交平台上傳咗幾張相，係同一眾義工去九龍灣清理街道，幫手清理磚頭、告示牌、欄杆等障礙物，話係恢復原社區原貌。
佢話落區之前，政府已清理現場大部分嘅障礙物，但仲有唔少磚留喺馬路上面，佢話嗰條街限速70公里，若果有車輾過磚頭同雜物，好易反車，亦可能捲起咗磚頭飛向途人就危險，所以落街將啲磚頭同雜物執番上行人路，佢仲幫手將欄杆同告示牌用索帶紮起，方便食環署日後處理。