政情：衝擊立會禍民生 輪到工程界求救
暑假接近尾聲，但呢兩個月香港過得好艱難，大型遊行示威不斷發生，多次變成衝突收場，對經濟影響開始浮現。不過，受影響行業又點止只得一兩個咁少，尋日就輪到立法會工務小組委員會（工務小組）主席、工程界盧偉國撻數字，似乎連工程界都開始嗌救命喇！
示威者嘅抗議活動遍布港九新界，唔少大型商場都成為目標，就連旅客必到嘅香港國際機場都有不合作運動，示威連場的確嚇怕唔少旅客，好似旅遊業早就大呻訪港旅客大減，搞到酒店業首當其衝成為重災區，而其他同旅遊業有關嘅行業，好似零售、飲食等深受影響。
逾700億元工程項目待財會審批
盧偉國近日就為工務工程批款做咗個簡報，話工務小組喺一八／一九立法年度一共通過咗逾一千四百億元嘅工程項目畀立法會財務委員會（財會）繼續審批，但財會仲未批出嘅撥款超過七百億元，呢啲項目包括有涉款一百六十億元嘅T2主幹路及茶果嶺隧道工程、廿四億元嘅橫洲公屋計劃工地基建、逾一百億元嘅葵涌醫院及威爾斯醫院等重建或擴建工程等，真係每一項都金額巨大喎。
其實財會原訂七月份時加會，以盡快審議工務小組批出嘅工程項目，可惜立法會大樓喺七月一日受到衝擊而嚴重破壞，搞到無法舉行會議並取消加開嘅財會，所以有超過七百億元嘅工程項目即使過咗工務小組，都仲未過到財會一關而乾等囉！
盧偉國就大嘆現時卡喺財會嘅工程項目都同民生有關，之前財會七月加會，有望以時間搭救盡快通過，避免民生同工程業界都受到影響，可惜立法會遭受破壞無法開會而粉碎咗呢個希望，現時惟有等到十月份復會。
盧偉國：幾年前拉布已有影響
雖然等多一個月左右就到十月份，但盧偉國依然好灰，話目前政治環境惡劣，根本無法樂觀面對目前情況，對於工務小組加咗會都未能令工程盡快動工，佢都話好無奈。佢更補充，工程界嘅困難唔係今時今日先出現，而係幾年前拉布不斷已經造成影響，咁講法現時工程界咪雪上加霜？