中環出更：蔣麗芸赴台考察癌症治療 被嘲令人發笑已可防癌
立法會議員蔣麗芸（Ann）喺開會個時語出驚人就人人都知，但佢同時都好關注癌症治療，尋日佢喺社交平台上傳咗張相，拖晒篋話要去台灣考察防癌心得，都惹起網民熱議。有網友就回應話「你個人咁搞笑，日日令香港人發笑已經有防癌功能，唔使浪費資源，去第二啲國家考察啦。」唔知係讚佢定彈佢呢？
網民笑言另類正能量
相中見到阿Ann喺機場擺咗個pose，佢話雖然香港社會事煩、家庭事多，但係依然牽掛香港醫療改革。唔少網民都留言質疑佢點解揀去台灣而唔係去其他地方考察。跟住有網民話唔單止佢令人發笑有防癌功能，仲係一種另類正能量，要封佢做女神添！
其實阿Ann都為咗癌症政策追問過政府好多次，之前立法會衞生事務委員會邀請議員就小組委員會去台灣外訪表達意見，結果直至限期，二十二名成員中，得四人表示同意小組委員會去台灣，因為唔夠半數人同意，最終去唔成，當時佢話惟有試吓同病人組織夾時間一齊去。可能因為咁，佢今次就同各界癌病關注嘅朋友去台灣考察。
卓妮